भारतीय वायुसेनाको विमान गौतमबुद्ध विमानस्थलमा अवतरण गरेको छ । भारतीय सुरक्षाकर्मी एसपीजी (स्पेशल प्रोटेक्सन गार्ड) को टोली लिएर आएको भारतीय वायुसेना विमान बुधबार बिहान भैरहवास्थित गौतमबुद्ध विमानस्थलमा अवतरण गरेको हो ।
बुद्ध जन्मस्थल लुम्बिनी भ्रमणमा आउन लागेका भारतीय प्रधानमन्त्री नरेन्द्र मोदीको भ्रमण सुरक्षा ब्यवस्था मिलाउन भारतीय सुरक्षाकर्मीको टोली नेपाल आएको हो । विमानमा भारतीय प्रधानमन्त्री मोदीले प्रयोग गर्ने गाडी समेत ल्याइएको छ ।
गौतमबुद्ध अन्तर्राष्ट्रिय विमानस्थलका प्रमुख गोविन्द दाहालले मोदीको सुरक्षा व्यवस्थापनका लागि भारतीय वायुसेनाको विमान आएको बताए । दिल्लीबाट आएको वायुसेनाको विमान गौतमबुद्ध अन्तर्राष्ट्रिय विमानस्थलमा अवतरण गरेको उनले बताए ।
मोदी लुम्बिनीमा आयोजना हुने २५६६ औं बुद्ध जयन्तीका अवसरमा जेठ २ गते लुम्बिनी भ्रमणमा आउँदैछन् । वायुसेनाको विमान सुरक्षाकर्मी र गाडी छाडेर आजै दिल्ली फिर्ता भएको छ । लुम्बिनीमा भारतले निमार्ण गर्न लागेको बिहार नेपालका प्रधानमन्त्री शेरबहादुर देउवा र भारतीय समकक्षी मोदीले संयुक्त रुपमा शिलान्यास गर्ने कार्यक्रम रहेको लुम्बिनी विकास कोषले जनाएको छ ।
