काठमाडौँसरकारले आगामी संसदीय निर्वाचनको मिति घोषणा गरेसँगै सत्ता गठबन्धनका दलहरुले समेत चुनावी तालमेल गर्ने निर्णय गरेका छन् । तर काँग्रेस नेताहरुबाट लगातार १६५ मध्ये सय सिट आफुले पाउनुपर्ने बताउन थालेका छन् ।त्यसमध्ये बचेको ६५ सिटमा दोस्रो दल बन्न खोजेको माओवादी सहित चार दलले चित्त बुझाउँलान् त भन्ने प्रश्न उब्जीएको
छ ।सिटको जोड घटाउले गठबन्धनको तालमेलमै समस्या पर्ने देखिन्छ । मुलतः सत्ता गठबन्धनको नेतृत्वकर्ता नेपाली काँग्रेसले गठबन्धनकै बलमा एकल बहुमत ल्याउने तयारी चलाइरहँदा अन्य दलहरुले आफ्नो समर्थनविना बहुमत पुग्नै नदिने गरि भागबण्डा गर्न खोजिरहेका छन् । यस्तो अवस्थामा काँग्रेसले कम्तिमा पनि सय सिट आफ्नो भागमा हुनेपर्ने दाबी गरिरहेको छ भनेअन्य चार दलले कम्तिमा ८० देखि ९० सिट आफ्नो पल्लामा हुनुपर्ने अडान लिइरहेका छन् ।जबकि प्रत्यक्षतर्फ मात्र १६५ सिट संख्या छ । यसैकारण गठबन्धनको गडजोड भत्किने खतरा छ ।किनकि चुनावको मिति घोषणा भएर तालमेल गर्ने निर्णय भइसक्दा गठबन्धनभित्रकै माओवादीका नेताहरु ओलीसँग मिल्न सक्ने सम्भावना देखिरहेका छन् । नेपाली काँग्रेसका नेता शशांक कोइरालाले शनिबार बिहानै चितवनबाट चुनावी तालमेल गर्नका लागि काँग्रेसले एक सय सिट पाउनुपर्ने बताएका छन् ।
महिनादिन अघि नै काँग्रेसले आफ्नो एकल बहुमत आउने गरि गठबन्धन गर्ने र चुनावपछि पनि सरकारको नेतृत्व आफैले गर्ने निर्णय गरेको थियो । जसमा नेकपा (माओवादी केन्द्र) र नेकपा (एकीकृत समाजवादी)ले चित्त बुझाएका छैनन् । किनकि काँग्रेसले स्थानीय चुनावमा बेइमानीको गरेको आरोप अझैसम्म पनि उनीहरु लगाइरहेका छन् । चुनावको मिति घोषणा भएपछि भागबण्डा मिलाउनका लागि ११ सदस्यीय कार्यदल बनाउने निर्णय गरेकाछन् । तर कुन आधार र मापदण्ड बनाएर भागबण्डा टुङग्याउने अन्योलता हटेको छैन ।
राष्ट्रिय सभाको उपनिर्वाचनमा गरेको चुनावी तालमेल र त्यसबाट प्राप्त परिणाम र स्थानीय तहको तालमेल र त्यसकै बलमा एमालेलाई कमजोर बनाएको उत्साह स्वरुप गठबन्धनका दलहरु फेरि पनि प्रतिनिधिसभा र प्रदेश सभाको तालमेलमा लाइनबद्ध भएका हुन् ।तर भागबण्डाको सकसपूर्ण राजनीतिले उनीहरुलाई एकै ठाउँमा एकै भएर इमान्दार बन्न चुनौती दिइरहेको छ ।
त्यसबाहेक प्रदेश सभाका ३३० सिटको बाँडफाँडमा पनि गठबन्धन थप संकटमा पर्ने स्थिति छ । उता गठबन्धनभित्रैबाट उपगठबन्धन बन्ने सम्भावना र यता एमालेसँगतालमेलसम्मको कुरा चलिरहँदा ओली भने प्रचण्डलाई दुध देखाएर पल्काउन सकिन्छ भन्ने सम्मको अभिव्यक्ति दिइरहेका छन् ।
गठबन्धनमा आवद्ध प्रचण्ड–माधवको मुल चाहना प्रथमतः देउवासँगै भागबण्डा मिलाएर जाने देखिन्छ । त्यसका लागि उनीहरुले मागेकै सिट संख्या दिन काँग्रेस तयार हुनुपर्नेछ । निर्वाचनपछि सरकारको नेतृत्व गर्ने अवसरका लागि समेत बार्गेनिङ चलिरहेको छ । बाँडफाँड नमिलेत्यहि भित्रै गठजोड बनाउने वा एमालेसँग जाने सम्भावनामाथि समेत नेताहरु आन्तरिक रुपमा निरन्तर छलफल चलाइरहेका छन् । तर पार्टी फुटेर चुलिएको तुषलाई एकाएक हटाएर फेरि एक हुने सम्भावनामाथि गम्भीर प्रश्न छ ।
