इटहरी । लैङ्गिक तथा यौनिक अल्पसंख्यकसँगै विषमलिङ्गी (पुरुष र महिला)हरुलाई आयआर्जनमा टेवा पुर्याउने उदेश्यले सुनसरीको इटहरीमा आयोजना गरिएको निःशूल्क मेकअप तालिम सोमबार सम्पन्न भएको छ ।
कन्सियोस कनेक्शन फाउण्डेशनको सहयोगमा श्रिङ्गार पेशाको क्षेत्रमा अनुभवि तथा परिचित मेकअप आर्टिस्ट निलम पौडेलले आयोजना गरेको १० दिने मेकअप तालिम जेठ २२ गतेदेखि सूरु भएको थियो । तालिममा प्रशिक्षार्थीहरुलाई श्रङ्गार सम्बन्धि सामाग्री, विभिन्न व्यक्ति र समयाअवस्थाका श्रृङ्गार विधिसाथै गुणस्तरीय प्रोडक्टहरुका बारेमा प्रशिक्षण गराइएको थियो ।
तालिमबारे जानकारी दिदै आयोजकसँगै प्रशिक्षकसमेत रहेकी निलम पौडेलले सरकारबाट उपेक्षीत बनेका लैङ्गिक तथा यौनिक अल्पसंख्यकहरु साथै सिप र दक्षता अभावका कारण बेरोजगार बनेका विषमलिङ्गी समुदायका व्यक्तिहरुलाई सिप सिकाएर उनिहरुको आयआर्जनमा टेवा पुर्याउने उदेश्यले तालिमको आयोजना गरिएको बताइन् ।
तालिमबारे जानकारी दिदैँ प्रशिक्षक सुशिल पौडेलले करिब ५ लाखको लागत खर्चमा तालिम सम्पन्न गरिएको बताए । तालिममा लैङ्गिक तथा यौनिक अल्पसंख्यक र विषमलिङ्गी गरि ४६ जनाबढीलाई प्रशिक्षण गराइएको उनले बताए ।
समापन कार्यक्रममा कन्सियोस कनेक्शन फाउण्डेशनकी सिइओ केसाङ लामा र प्रशिक्षक निलम पौडेलले प्रशिक्षार्थीहरुलाई श्रृङ्गार सामाग्री प्रदान गरेका थिए । कार्यक्रममा सिइओ लामा, मानव कल्याण समाज इटहरीका प्रमुख देवानन्द चौधरी, क्रिस्टीना मगरलगायतका अतिथिहरु र प्रशिक्षकद्धय तथा प्रशिक्षार्थीहरुको उपस्थिति रहेको थियो ।
Discussion about this post